ହିମାଚଳ ପ୍ରଦେଶର କୁଲ୍ଲୁରେ ବଡ଼ ଧରଣର ଭୂସ୍ଖଳନ: ୬ ଜଣଙ୍କ ମୃତ୍ୟୁ

କୁଲ୍ଲୁ: ହିମାଚଳ ପ୍ରଦେଶର କୁଲ୍ଲୁରେ ଆଜି ଏକ ବଡ଼ ଧରଣର ଭୂସ୍ଖଳନ ହୋଇ ୬ ଜଣଙ୍କ ମୃତ୍ୟୁ ଘଟିଛି ଏବଂ ୫ ଜଣ ଆହତ ହୋଇଛନ୍ତି। କୁଲ୍ଲୁର ମଣିକରଣ ଗୁରୁଦ୍ୱାର ପାର୍କିଂ ନିକଟରେ ଏକ ଗଛ ସହିତ ଅତଡ଼ା ଧସିଥିଲା। ଘଟଣାସ୍ଥଳରେ ହିଁ ୬ ଜଣଙ୍କ ମୃତ୍ୟୁ ହୋଇଥିବା ସ୍ଥାନୀୟ ପ୍ରଶାସନ ସୂତ୍ରରୁ ଜଣାପଡ଼ିଛି। ଦୁର୍ଘଟଣା ଖବର ପାଇ ପୁଲିସ ଓ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରିଥିଲେ।

କୁଲ୍ଲୁ ଏଡିଏମ୍ ଅଶ୍ୱିନୀ କୁମାର କହିଛନ୍ତି ଯେ ଗୁରୁଦ୍ୱାର ପାର୍କିଂ ସ୍ଥଳ ନିକଟରେ ଭୂସ୍ଖଳନ ପରେ ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରି ଅବରୋଧ ହଟାଇଥିଲା। ପ୍ରାଣ ହରାଇଥିବା ୬ ଜଣଙ୍କ ମଧ୍ୟରେ ୩ ଜଣ ମହିଳା ଅଛନ୍ତି। ଅପରାହ୍ନ ୫ଟାରେ ଏହି ଘଟଣା ଘଟିଥିବା ଜଣାପଡ଼ିଛି। ରାସ୍ତା କଡ଼ରେ କିଛି ଲୋକ ବସିଥିବା ବେଳେ ଗଛ ସହିତ ଅତଡ଼ା ଧସିବାରୁ ଲୋକମାନେ ଏହା ତଳେ ଚାପି ହୋଇଯାଇଥିଲେ। ମୃତକ ୬ ଜଣଙ୍କ ମଧ୍ୟରୁ ୨ ଜଣ ସ୍ଥାନୀୟ ଏବଂ ୪ ଜଣ ବାହାରୁ ଆସିଥିବା ଜଣାପଡ଼ିଛି।

Leave a Reply

Your email address will not be published. Required fields are marked *