ନ୍ୟାୟ କରିବା ଦ୍ବାରା ସମାଜରେ ଶାନ୍ତି ଶୃଙ୍ଖଳା ପ୍ରତିଷ୍ଠା ହୁଏ

କଟକ: ମଙ୍ଗଳାବାଗ ସ୍ଥିତ ଅହମଦୀୟା ମୁସଲିମ ମିଶନ ଠାରେ ଅହମଦୀୟା ମୁସଲିମ ସଂଗଠନର ଆନ୍ତଃସଂଗଠନ ମଜଲିସ ଅନସାରୁଲ୍ଲାଃ ତରଫରୁ ରାଜ୍ୟସ୍ତରୀୟ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଛି ।

ଏହି ଶିବିରର ଉଦଘାଟଣୀ ଉତ୍ସବରେ ପୌରୋହିତ୍ୟ କରିଥିଲେ ଅଖିଳ ଭାରତ ମଜଲିସ ଅନସାରୁଲ୍ଲାର ଉପଭାପତି ସଫାରତ ଖାଁ । ପବିତ୍ର କୋରାନ ପାଠ କରିଥିଲେ କଟକର ମୌଲାନା ଫଜଲ ହକ ଖାଁ । ସଂଗଠନର ସପଥ ପାଠ ସଭାପତି କରାଇଥିବା ବେଳେ ଉର୍ଦ୍ଦୁ ସଂଗୀତ ସେକ ବାହାଦୁର ପଢିଥିଲେ । ମୁଖ୍ୟ ବକ୍ତାଭାବେ ଯୋଗଦେଇ କଟକ ଜିଲ୍ଲା ମଜଲିସ ଅନସାରୁଲ୍ଲାଃ ସଂଗଠନର ମୁଖ୍ୟ ମୌଲାନା ହାରୁନ ରଶିଦ କହିଲେ, ସତ୍ କର୍ମରେ ଆଗକୁ ବଢିଚାଲ । ମହାପୁରୁଷଙ୍କ ଆଦର୍ଶ ହିଁ ଅନ୍ୟଙ୍କୁ ପ୍ରେରଣା ଦେଇଥାଏ । ପଦ ଏକ ଅମାନତ ଅଟେ । ଜଣେ ଧର୍ମବିଶ୍ବାସୀ ସର୍ବଦା ଅମାନତଦାର ହୋଇଥାଏ । ସମସ୍ତେ ସଚ୍ଚୋଟ ଓ କର୍ତ୍ତବ୍ୟ ପରାୟଣ ହେବା ଉଚିତ୍ । ଧର୍ମସେବା ଦ୍ବାରା ଆୟୁଷ ବୃଦ୍ଧି ହୋଇଥାଏ । କର୍ମଯୋଗୀ ସବୁଠି ପ୍ରଶଂସିତ ଓ ସମ୍ମାନିତ ହୋଇଥାଏ । ପଦର ସଦବ୍ୟବହାର କରିବା ଉଚିତ୍ । ନ୍ୟାୟକୁ ସର୍ବଦା ପ୍ରୋତ୍ସାହନ ଦେବା ଉଚିତ୍ । ନ୍ୟାୟ କରିବା ଦ୍ବାରା ସମାଜରେ ଶାନ୍ତି ଶୃଙ୍ଖଳା ପ୍ରତିଷ୍ଠା ହୁଏ । ଦ୍ବିତୀୟ ବକ୍ତାଭାବେ ଭଦ୍ରକ ଓ ବାଲେଶ୍ବର ଜିଲ୍ଲା ମଜଲିସ ଅନସାରୁଲ୍ଲାଃର ମୁଖ୍ୟ ଅବଦୁଲ ଓଦୁଦ ଖାଁ ଯୋଗଦେଇ ମଜଲିସ ଅନସାରୁଲ୍ଲା ସଂଗଠନ ପ୍ରତିଷ୍ଠା ହେବାର ଉଦ୍ଦେଶ୍ୟ ବିଷୟରେ ମତ ରଖିଥିଲେ । ତୃତୀୟ ବକ୍ତାଭାବେ ଜିଲ୍ଲା ଖୋର୍ଦ୍ଧା, ପୁରୀ ଓ ନୟାଗଡ ମଜଲିସ ଅନସାରୁଲ୍ଲା ସଂଗଠନର ମୁଖ୍ୟ ମୌଲାନା ମହମ୍ମଦ ମେରାଜ ଅଲ୍ଲି ଯୋଗଦେଇ କହିଲେ, ମଜଲିସ ଅନସାରୁଲ୍ଲାଃ ମୁରବିମାନଙ୍କର ସଂଗଠନ, ସମାଜ ଓ ସଂସାର ପ୍ରତି ତାଙ୍କର କର୍ତ୍ତବ୍ୟ ଓ ଦାୟିତ୍ବ ବହୁତ ଗୁରୁତ୍ବପୂର୍ଣ୍ଣ । ସଭାପତି ସଫାରତ ଖାଁ ପ୍ରଶିକ୍ଷଣ ଶିବିରର ଉଦ୍ଦେଶ୍ୟ ତଥା ଅହମଦୀୟା ମୁସଲିମ ସଂଗଠନର ବିଶ୍ବଗୁରୁ ହଜରତ ମିର୍ଜା ମସରୁର ଅହମଦଙ୍କ ବାର୍ତ୍ତାକୁ ପଢି ଶୁଣାଇବା ସହ ସଂଗଠନର କାର୍ଯ୍ୟକୁ ସୁଦୃଢ କରିବା, କାର୍ଯ୍ୟରେ ତତପରତା ଆଣିବା, କର୍ତ୍ତବ୍ୟ ନିଷ୍ଠ ଓ କର୍ମଯୋଗୀ ହେବା ପାଇଁ ଅନସାରମାନଙ୍କୁ ଆହ୍ବାନ ଦେବା ସହ ତାଙ୍କ ବାର୍ଷିକ କାର୍ଯ୍ୟକାରିଣୀର ସମୀକ୍ଷା କରିଥିଲେ । ସମ୍ମାନିତ ଅତିଥି ଭାବେ କଟକ ଅହମଦୀୟା ମୁସଲିମ ସଂଗଠନର ସଭାପତି ସୟଦ ତୟବ ଅହମଦ ସଲିମ ଯୋଗଦେଇଥିଲେ । ଏହି ଶିବିରରେ ବାଲେଶ୍ବର, ଭଦ୍ରକ, ଯାଜପୁର, କଟକ, ଜଗତସିଂ ପୁର, ସୁନ୍ଦରଗଡ, ଖୋର୍ଦ୍ଧା ଓ ନୟାଗଡର ୬୦ରୁ ଊର୍ଦ୍ଧ୍ବ ମଜଲିସ ଅନସାରୁଲ୍ଲାଃ ସଂଗଠନର ପଦାଧିକାରୀ, ପ୍ରତିନିଧି ଓ କର୍ମକର୍ତ୍ତାମାନେ ଯୋଗଦେଇଥିଲେ । ଏହି କାର୍ଯ୍ୟକ୍ରମକୁ ମୌଲାନା ଫଜଲ ହକ ଖାଁ ପରିଚାଳନା କରିଥିଲେ ।