ତାଞ୍ଜାନିଆରେ ଥିବା ଆଫ୍ରିକା ମହାଦେଶର ସର୍ବୋଚ୍ଚ ଗିରିଶୃଙ୍ଖ ‘ମାଉଣ୍ଟ କିଲିମାଞ୍ଜାରୋ’ ଚଢ଼ିଲେ ଓଡ଼ିଆ ଦମ୍ପତି
ଭୁବନେଶ୍ବର: ତାଞ୍ଜାନିଆରେ ଥିବା ଆଫ୍ରିକା ମହାଦେଶର ସର୍ବୋଚ୍ଚ ଗିରିଶୃଙ୍ଖ ‘ମାଉଣ୍ଟ କିଲିମାଞ୍ଜାରୋ’କୁ ସଫଳତାର ସହ ଆରୋହଣ କରିଛନ୍ତି ଓଡ଼ିଶାର ସୌଭାଗ୍ୟ କୁମାର ରଥ ଓ ଡ. ସାଗରିକା ରଥ। ୧୯୩୪୧ ଫୁଟ ଉଚ୍ଚତା ବିଶିଷ୍ଟ ଏହି ଗିରିଶୃଙ୍ଗ ଚଢ଼ିବାରେ ଉଭୟ ପ୍ରଥମ ଓଡ଼ିଆ ପତି-ପତ୍ନୀ ହେବାର ଗୌରବ ଅର୍ଜନ କରିଛନ୍ତି। ସାଗରିକା ବ୍ୟକ୍ତିଗତ ପ୍ରଥମ ପ୍ରାଣୀ ଚିକିତ୍ସକ ଏବଂ ପ୍ରଥମ ସରକାରୀ କର୍ମଚାରୀ ଭାବେ କିଲିମାଞ୍ଜାରୋ ଶିଖରରେ ପାଦ ଥାପିଛନ୍ତି। ସେହିଭଳି ସୌଭାଗ୍ୟ ନିଜ ଦୁଃସାହସିକ କ୍ରୀଡ଼ା କ୍ୟାରିୟର୍ରେ ସଫଳତାର ଆଉ ଏକ ଫର୍ଦ୍ଦ ଯୋଡ଼ିଛନ୍ତି।
ସାଗରିକା ଓ ସୌଭାଗ୍ୟ ଗତ ୨୦ ତାରିଖରେ ଭୁବନେଶ୍ବରରୁ ଏହି ଦୁଃସାହାସିକ ଅଭିଯାନରେ ବାହାରିଥିଲେ। ସୌଭାଗ୍ୟ ମଧ୍ୟ ସଫଳତାର ସହ ତାଞ୍ଜାନିଆର ମୋସୀଠାରେ ଆୟୋଜିତ ହେବାକୁ କିଲିମାଞ୍ଜାରୋ ଅନ୍ତର୍ଜାତୀୟ ମାରାଥନ୍ ଶେଷ କରିଥିଲେ। ଏହା ପରେ ଉଭୟ ରଙ୍ଗୋଇ ଗେଟ୍ଠାରୁ ଅଭିଯାନ ଆରମ୍ଭ କରି କିବୋ ହଟ୍ଠାରେ ଥିବା ବେସ୍ କ୍ୟାମ୍ପଠାରୁ ୫୬୮୧ ମିଟର ଉଚ୍ଚରେ ଥିବା ଗିଲମାନ୍ ପଏଣ୍ଟ୍ରେ ପହଞ୍ଚିଥିଲେ। ତାପମାତ୍ରା ଶୂନଠାରୁ ୧୫ ଡିଗ୍ରୀ ତଳେ ରହିବା ଏବଂ ଅଚାନକ ବରଫ ଝଡ଼ର ସମ୍ମୁଖୀନ ହେବା ସତ୍ତ୍ବେ ରାତି ୧୨ଟା ପରଠାରୁ ନିଜ ଅଭିଯାନକୁ ଆହୁରି ତୀବ୍ର କରି ଶୁକ୍ରବାର ସ୍ଥାନୀୟ ସମୟ ସକାଳ ୭ଟା ଏବଂ ଭାରତୀୟ ସମୟ ୯ଟା ୩୦ରେ କିଲିମାଞ୍ଜାରୋ ଶିଖରରେ ପହଞ୍ଚିଥିଲେ। ପାରମ୍ପରିକ ଓଡ଼ିଆ ପୋଷାକ ପିନ୍ଧି ସେଠାରେ କିଛି ସମୟ କଟାଇବା ସହ ବନ୍ଦେ ଉତ୍କଳ ଜନନୀ ମଧ୍ୟ ଗାନ କରିଥିଲେ।
ସୌଭାଗ୍ୟ ଓ ସାଗରିକାଙ୍କର ପାହାଡ଼ ଚଢ଼ା ତଥା ଦୁଃସାହସିକ ଅଭିଯାନର ଦୀର୍ଘ ଅଭିଜ୍ଞତା ରହିଛି। ସୌଭାଗ୍ୟ ଦୁଇ ଥର ଅତ୍ୟନ୍ତ କଷ୍ଟକର ‘ଆଇରନ୍ ମ୍ୟାନ୍’ ମୁକୁଟକୁ ସଫଳତାର ସହ ଶେଷ କରିଛନ୍ତି। ସେ ମଧ୍ୟ ସଫଳତାର ସହ ୟୁରୋପ ମହାଦେଶର ସର୍ବୋଚ୍ଚ ଗିରିଶୃଙ୍ଗ ମାଉଣ୍ଟ୍ ଏଲବ୍ରସ୍ ଆରୋହଣ କରି ସାରିଛନ୍ତି। ସାଗରିକା ଜଣେ ପ୍ରାଣୀ ଚିକିତ୍ସକ ଭାବେ ସମ୍ବଲପୁର ଜିଲ୍ଲା ରେଙ୍ଗାଳୀ ବ୍ଲକ୍ରେ ଅବସ୍ଥାପିତ ଥିଲା ବେଳେ ସୌଭାଗ୍ୟ ସମ୍ବଲପୁର ଆକାଶବାଣୀରେ ଟ୍ରାନ୍ସମିସନ୍ ଏକଜିକ୍ୟୁଟିଭ୍ ବା ପ୍ରସାରଣ ନିଷ୍ପାଦକ ଭାବେ କାର୍ଯ୍ୟରତ ଅଛନ୍ତି।
