ଆପ୍ରୁ ଦିଲ୍ଲୀ ମେୟର ପ୍ରାର୍ଥୀ ହେଲେ ଶେଲୀ ଓବରୟ
ନୂଆଦିଲ୍ଲୀ: ବିଜେପି ଠାରୁ ଦିଲ୍ଲୀ ମହାନଗର ନିଗମ(ଏମସିଡି) ଛଢ଼ାଇ ଆଣିଥିବା ଆପ୍ ଆଜି ମେୟର ଓ ଡେପୁଟି ମେୟର ପ୍ରାର୍ଥୀଙ୍କ ନାଁ ଘୋଷଣା କରିଛି। ଦଳ ପକ୍ଷରୁ ଶେଲୀ ଓବରୟଙ୍କୁ ଦିଲ୍ଲୀର ମେୟର ପ୍ରାର୍ଥୀ କରାଯାଇଥିବା ବେଳେ ମାଟିଆ ମହଲର ବିଧାୟକ ସୋଏବ ଇକବାଲଙ୍କ ପୁଅ ଆଲେ ମହମ୍ମଦ ଇକବାଲଙ୍କୁ ଡେପୁଟି ମେୟର ପ୍ରାର୍ଥୀ କରାଯାଇଛି।
ଏମସିଡି ନିର୍ବାଚନରେ ଆପ୍ ୧୩୪ଟି ଆସନ ଜିତିଥିବାରୁ ଦଳର ଦୁଇ ପ୍ରାର୍ଥୀ ବେଶ ସହଜରରେ ବିଜୟ ଲାଭ କରିବେ ବୋଲି ଆଶା କରାଯାଉଛି। କିନ୍ତୁ ମେୟର ନିର୍ବାଚନରେ ଦଳବଦଳ ନିରୋଧ ଆଇନ ଲାଗୁ ହେବନି। ତେଣୁ ଦଳୀୟ ଟିକେଟରେ ନିର୍ବାଚନ ଜିତିଥିବା କର୍ପୋରେଟରମାନେ ନିଜ ଇଚ୍ଛାରେ ମେୟର ଓ ଡେପୁଟି ମେୟର ପଦ ପାଇଁ ଭୋଟ ଦେଇପାରିବେ।
ଶେଲୀ ଚଳିତ ବର୍ଷ ପ୍ରଥମଥର ପାଇଁ ଏମସିଡି ନିର୍ବାଚନ ଲଢ଼ିଥିଲେ। ତାଙ୍କୁ ଆପ୍ ଇଷ୍ଟ ପଟେଲ ନଗର-ୱାର୍ଡ ନମ୍ବର ୮୬ରୁ ପ୍ରାର୍ଥୀ କରିଥିଲା। ଶେଲୀ ଜଣେ ଆସିଷ୍ଟାଣ୍ଟ ପ୍ରଫେସର। ସେ ଦିଲ୍ଲୀ ବିଜେପି ମୁଖ୍ୟ ଆଦେଶ ଗୁପ୍ତାଙ୍କ ଗଡ଼ ଭାବେ ପରିଚିତ ପଟେଲ ନଗରରୁ ଜିତିଥିଲେ। ଏହି କାରଣରୁ ଆପ୍ ତାଙ୍କୁ ମେୟର ପ୍ରାର୍ଥୀ କରିଛି। ସେହିପରି ଇକବାଲ ମଧ୍ୟ ଦମଦାର ବିଜୟ ହାସଲ କରିଥିଲେ।
ସୂଚନାଯୋଗ୍ୟ, ଆସନ୍ତା ଜାନୁଆରୀ ୬ରେ ମେୟର ପଦ ପାଇଁ ନିର୍ବାଚନ ଅନୁଷ୍ଠିତ ହେବ। ଏହି ନିର୍ବାଚନରେ କୌଣସି ମନୋନୀତ ସଦସ୍ୟ ଭୋଟ ଦେଇପାରିବେ ନାହିଁ। ନବନିର୍ବାଚିତ କର୍ପୋରେଟରଙ୍କ ସମେତ ୧୪ ଜଣ ବିଧାୟକ ଓ ୧୦ ଜଣ ସାଂସଦ ଭୋଟ ଦେଇପାରିବେ।
କର୍ପୋରେଟରଙ୍କ ବ୍ୟତୀତ ଏମସିଡିକୁ ୧୪ ଜଣ ବିଧାୟକ ମନୋନୀତ ହୋଇଥାଆନ୍ତି। ପ୍ରତିବର୍ଷ ଏମାନେ ବଦଳନ୍ତି। ବର୍ତ୍ତମାନ ୧୪ ମନୋନୀତ ବିଧାୟକଙ୍କ ମଧ୍ୟରୁ ୧୨ କିମ୍ବା ୧୩ ଜଣ ଆପ୍ରୁ ଓ ଜଣେ କି ଦୁଇ ଜଣ ବିଜେପିରୁ ମନୋନୀତ ହେବେ। ଏହାବାଦ ଲୋକସଭାରୁ ୭ ଜଣ ଓ ରାଜ୍ୟସଭାର ୩ ଜଣ ସାଂସଦ ମଧ୍ୟ ମନୋନୀତ ସଦସ୍ୟ।
ଏମାନେ ସମସ୍ତେ ମେୟର ନିର୍ବାଚନରେ ଭୋଟ ଦେଇପାରିବେ। ଏହାର ଅର୍ଥ ୨୪ ଜଣ ବିଧାୟକ ଓ ସାଂସଦଙ୍କ ମଧ୍ୟରୁ ୧୫ରୁ ୧୬ ଜଣ ଆପର ଓ ୮ରୁ ୯ ଜଣ ବିଜେପିର ସଦସ୍ୟ। ତେଣୁ ଆପ୍ ବେଶ ସହଜରେ ମେୟର ନିର୍ବାଚନ ଜିତିବ ବୋଲି କୁହାଯାଉଛି।
