‘ନକ୍ଷତ୍ରର ନାମ ସ୍ବାତୀ’ ଏବଂ ‘ଅଖିଳ ରସ ଚିନ୍ତାମଣି’ ପୁସ୍ତକ ଉନ୍ମୋଚିତ
ଭୁବନେଶ୍ଵର : ସୃଜନଶୀଳତା ବ୍ୟକ୍ତିତ୍ଵର ପରିଚୟ, ସର୍ଜନା ଅଭିବ୍ୟକ୍ତିର ମାଧ୍ୟମ। ଉଭୟର ମଧୁର ସମନ୍ଵୟରେ ସୃଷ୍ଟି ହୁଏ ସାହିତ୍ୟ । ସେହି ସାହିତ୍ୟ ବ୍ୟକ୍ତିକୁ ପରିଚିତ କରିବା ସହିତ ସମାଜର ଅକୁହା କଥାକୁ କହିବାପାଇଁ ସାହସ ଦେଇଥାଏ ବୋଲି ଓଡିଆ ଅଧ୍ୟୟନ ଉ ଗବେଷଣା ସଂସ୍ଥା ପକ୍ଷରୁ ଆୟୋଜିତ ସାରସ୍ଵତ ସ୍ମାରକ ପର୍ବର ପୁସ୍ତକ ଉନ୍ମୋଚନ ଉତ୍ସବରେ ଯୋଗ ଦେଇ ବକ୍ତାମାନେ ମତବ୍ୟକ୍ତ କରିଥିଲେ। କବି ତଥା ରାଜନେତା ଡକ୍ଟର ସିପ୍ରା ମଲ୍ଲିକଙ୍କ ଦ୍ଵିତୀୟ କବିତା ସଂକଳନ “ ନକ୍ଷତ୍ରର ନାମ ସ୍ଵାତୀ” ଏବଂ ମଧ୍ୟଯୁଗୀୟ କବି ପିତାମ୍ବର ଦାସଙ୍କ ଅଳଙ୍କାର କାବ୍ୟକୁ ସମ୍ପାଦନା କରିଥିବା ଡକ୍ଟର ହରେକୃଷ୍ଣ ପାତ୍ରଙ୍କ “ଅଖିଳ ରସ ଚିନ୍ତାମଣି” ପୁସ୍ତକ ଦ୍ୱୟକୁ ମୁଖ୍ୟ ଅତିଥି ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ମାନ୍ୟବର ମନ୍ତ୍ରୀ ଶ୍ରୀଯୁକ୍ତ ଅଶ୍ଵିନୀ କୁମାର ପାତ୍ର ଲୋକାର୍ପଣ କରି ଓଡିଆ ଭାଷାସାହିତ୍ୟପାଇଁ ଏହି ଦୁଇଟି ପୁସ୍ତକ ଏକ ଅମୂଲ୍ୟ ସମ୍ପଦ ବୋଲି କହିଥିଲେ। ମୁଖ୍ୟବକ୍ତା ଭାବରେ ତିରୁପତି କେନ୍ଦ୍ରିୟ ସଂସ୍କୃତ ବିଶ୍ଵବିଦ୍ୟାଳୟ ପ୍ରାକ୍ତନ କୁଳପତି ପ୍ରଫେସର ଡକ୍ଟର ହରେକୃଷ୍ଣ ଶତପଥୀ ନିଜ ବକ୍ତବ୍ୟରେ ଆଦିକବି ଶଙ୍କରାଚାର୍ଯ୍ୟଙ୍କ ଜୀବନୀକୁ ଉଦ୍ଧୃତ କରି ମାତାର ସ୍ଥାନ ସର୍ବଦା ସର୍ବୋଚ୍ଚ ଶିଖରରେ ବୋଲି ଅବିହିତ କରିବା ସହିତ ମାଆ ଆଉ ମାଟି ପ୍ରତି କବି ଡକ୍ଟର ମଲ୍ଲିକଙ୍କ ଆବେଗକୁ ପ୍ରଶଂସା କରିଥିଲେ । ବିଶିଷ୍ଟ ଅତିଥ୍ ଭାବରେ ପଦ୍ମଶ୍ରୀ ଦେବୀପ୍ରସନ୍ନ ପଟ୍ଟନାୟକ ଓଡିଆ ଅଧ୍ୟୟନ ଓ ଗବେଷଣା ସଂସ୍ଥାର କାର୍ଯ୍ୟକୁ ପ୍ରଶଂସା କରି ଏହି ଅନୁଷ୍ଠାନ ଗବେଷଣା ସହିତ ସାହିତ୍ୟ ଚର୍ଚ୍ଚାକୁ ପ୍ରାଧାନ୍ୟ ଦେଉଥିବାରୁ ଓଡିଆ ଭାଷା ସମୃଦ୍ଧ ଓ ଶକ୍ତିଶାଳୀ ହେଉଥିବା ଏକ ଏକ ଶୁଭ ସୂଚନା ବୋଲି କହିଥିଲେ। ବିଶିଷ୍ଟ ଭାଷାବିତ ପ୍ରଫେସର ନଟବର ଶତପଥୀଙ୍କ ସଭାପତିତ୍ବରେ ଅନୁଷ୍ଠିତ ଏହି ସଭାରେ “ ନକ୍ଷତ୍ରର ନାମ ସ୍ୱାତୀ” ପୁସ୍ତକର ସମୀକ୍ଷା କବି ସୁନନ୍ଦା କରିଥିବାବେଳେ “ ଅଖିଳ ରସ ଚିନ୍ତାମଣି” ପୁସ୍ତକର ସମୀକ୍ଷା ଡକ୍ଟର ସୁବ୍ରତ କୁମାର ପୃଷ୍ଟି କରିଥିଲେ। ପ୍ରକାଶକ ବିଜୟ କୁମାର ମହାନ୍ତି ଧନ୍ୟବାଦ ଅର୍ପଣ କରିଥିଲେ ।
