ଦେଶର ପ୍ରଥମ ନାଜାଲ କୋଭିଡ ଟିକାର ଶୁଭାରମ୍ଭ : ଜାଣନ୍ତୁ କେତେ ରହିଛି ଦାମ
ନୂଆଦିଲ୍ଲୀ: ଗଣତନ୍ତ୍ର ଦିବସ ଅବସରରେ ଦେଶର ପ୍ରଥମ ନାଜାଲ କୋଭିଡ ଟିକା ଇନକୋଭାକକୁ ଲଞ୍ଚ କରାଯାଇଛି | ଏହି ଟିକା ନାକରେ ଦିଆଯିବ |କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ମନସୁଖ ମାଣ୍ଡଭିଆ ଏବଂ ବିଜ୍ଞାନ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଜିତେନ୍ଦ୍ର ସିଂ ଏହି ଟିକାକୁ ଲଂଚ କରିଛନ୍ତି। ଏହି ସ୍ୱଦେଶୀ ଟିକାକୁ ଭାରତ ବାୟୋଟେକ୍ ଦ୍ୱାରା ପ୍ରସ୍ତୁତ କରାଯାଇଛି | ଗତ ଶନିବାର ଦିନ କମ୍ପାନୀର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ କୃଷ୍ଣ ଏଲା ଗଣତନ୍ତ୍ର ଦିବସ ଅବସରରେ ଏହାକୁ ଲଞ୍ଚ କରାଯିବ ବୋଲି ଘୋଷଣା କରିଥିଲେ।
ସୂଚନାଯୋଗ୍ୟ ଯେ, ଗତ ବର୍ଷ ଡିସେମ୍ବରରେ ଭାରତ ବାୟୋଟେକ ଘୋଷଣା କରିଥିଲା ଯେ ଏହି ଟିକାକୁ ସରକାରଙ୍କୁ ପ୍ରତି ସଟ ପିଛା ୩୨୫ ଟଙ୍କା ଏବଂ ଘରୋଇ ଟିକାକରଣ କେନ୍ଦ୍ରକୁ ୮୦୦ ଟଙ୍କାରେ ବିକ୍ରି କରିବ। ୱାଶିଂଟନ୍ ୟୁନିଭରସିଟି ସ୍କୁଲ୍ ଅଫ୍ ମେଡିସିନ୍ (ଡବ୍ଲୁଏସ୍ଏମ୍) ସହିତ ମିଳିତ ଭାବରେ ଭାରତ ବାୟୋଟେକ୍ ଦ୍ୱାରା ନାଜାଲ୍ ଟିକା ପ୍ରସ୍ତୁତ କରାଯାଇଛି। ଭାରତ ବାୟୋଟେକ୍ କରୋନାର ପ୍ରଥମ ସ୍ୱଦେଶୀ ଟିକା କୋଭାକ୍ସିନ୍ ମଧ୍ୟ ପ୍ରସ୍ତୁତ କରିଥିଲା | ଭାରତ ବାୟୋଟେକ୍ ଏହି ନାଜାଲ ଟିକାର ନାମ iNCOVACC(ଇନକୋଭାକ) ନାମରେ ନାମିତ କରିଛି | ପୂର୍ବରୁ ଏହାର ନାମ ବିବିଭି୧୫୪ ରଖାଯାଇଥିଲା | ଏହି ଟିକା ନାକ ମାଧ୍ୟମରେ ଦିଆଯାଏ | ଏହି ଟିକା ଶରୀରରେ ପ୍ରବେଶ କରିବା ମାତ୍ରେ କରୋନା ସଂକ୍ରମଣକୁ ରୋକିଥାଏ |
ଏହାପୂର୍ବରୁ, ସେପ୍ଟେମ୍ବର ୬ ରେ, ଡିଜିସିଆଇ ଏହାର ଇଣ୍ଟ୍ରାନାଜାଲ୍ କୋଭିଡ-୧୯ ଟିକା, ଇନକୋଭାକକୁ ୧୮ ବର୍ଷରୁ ଅଧିକ ବୟସ୍କମାନଙ୍କ ଜରୁରୀକାଳୀନ ବ୍ୟବହାର ପାଇଁ ଅନୁମୋଦନ କରିଥିଲା | ଭାରତ ବାୟୋଟେକ୍ ଡିଜିସିଆଇରୁ ଇଣ୍ଟ୍ରାନାଜାଲ୍ ହେଟେରୋଲୋଜିସ୍ ବୁଷ୍ଟର୍ ପାଇଁ ମଧ୍ୟ ଆବେଦନ କରିଥିଲା। ସ୍ୱାସ୍ଥ୍ୟ ମନ୍ତ୍ରଣାଳୟର କହିବାନୁସାରେ, ଏହି ଟିକା ଏକ ବୁଷ୍ଟର ଡୋଜ ଭାବେ ଦିଆଯିବ | ପ୍ରତ୍ୟେକ ବ୍ୟକ୍ତିଙ୍କୁ ଏହାର ଚାରି ବୁନ୍ଦା ଦିଆଯିବ |
